هاشم ميرغني «كلمات الأغانى»

تقليص
هذا موضوع مثبت
X
X
 
  • تصفية - فلترة
  • الوقت
  • عرض
إلغاء تحديد الكل
مشاركات جديدة

  • #31
    هاشم ميرغني "كلمات أغنية عزيز ياعزيز"



    كلمات والحان هاشم ميرغني


    عزيز ياعزيز

    يا عزيز ياعزيز وين ما هنت
    والله قاسي الزمن الشالك إنت

    ياعزيز لو تدري العلينا
    دمعاتنا جاريه بعينينا
    إنت لو فاكرنا بننسى..
    إنت زولنا وإنت فينا
    تشرق الازهار يوم تجينا
    وياعزيز ضحكاتك حنينه

    ياعزيز انا ساهر ليالي
    ذكراك دايماً في بالي
    يالجميل الساكن خيالي
    هالكنا وما بتبالي

    ياعزيز الغربه ودموعها
    وإنت يا أنوارها وشموعها
    شوف قلوبنا كيفن ولوعها
    إنت ربك يكتب رجوعها

    ويا عزيز ياعزيز وين ما هنت
    والله قاسي الزمن الشالك إنت

    تعليق


    • #32
      هاشم ميرغني "كلمات أغنية ألمي كلو عشانك انت"


      كلمات والحان هاشم ميرغني

      ألمي كلو

      كلو عشانك إنت
      وسهري كلو عشانك إنت

      تبريح الزمن طال بي..
      صحاني من حلماً معاك يطول
      اريتو يطول معاهو عمري..
      اقضيهو اغني ليك واقول
      واحكي ليك عن الحكاوي كتير..
      وكيف بقت الغناوي رسول
      تمش من داري شايله الشوق..
      وتحلم بي كلام معسول
      تعود بيهو لي انا الصابر..
      وبي قسوة جفاك مكتول

      يا احلى الناس امام نظري
      انا بكتم في وانحي الشوق..
      واهواك وإنت ما بتدري
      ولو خاطرك تجافيني..
      ببقى جفاك لي قدري
      وبلقاك حتى في نومي..
      وللا آخر مره في عمري

      وألمي كلو عشانك إنت
      وسهري كلو عشانك إنت

      تعليق


      • #33
        هاشم ميرغني "كلمات أغنية افوت عينيك"


        افوت عينيك

        افوت عينيك اقبل ووين
        واسيبك إنت بس لي مين
        مجبور غايتو بتحمل عشان خاطرك واضحي سنين

        اغيب ياحلوه عن دنياك اعيش في الدمعه والآها
        اباري وراك خطاوي الشوق احس بالدنيا تواها
        اعود للناس وافراحم عشان احزاني انساها
        الاقي الناس غريبه علي والاقي الدنيا ما ياها

        ليل الفرقه لما يطل ببين ياحلوه زي حولين
        ادوب في الذكرى والأشواق اعيش الصبر بي صبرين
        عزاي دمعة مسافر ليل إحلم بي لقى الغايبين
        حنانك يازمن طاوعنا وكفايه نعيش وراك تايهين

        خلاص انا برضى بي بعدك مدام ما اصلو مقسوم لي
        إلا بخاف على عيونك تصبح يوم غريبه علي
        لما اعود وما القاك شايل قلبي بين إيدي
        بسلِّم امري للأيام اموت والدمعه في عيني

        افوت عينيك اقبل ووين
        واسيبك إنت بس لي مين
        مجبور غايتو بتحمل عشان خاطرك واضحي سنين

        تعليق


        • #34
          هاشم ميرغني "كلمات ماخلاص انحنا افترقنا"


          ماخلاص

          ماخلاص إحنا إفترقنا وروحت ريدتي البريدها
          قسمه غايتو اعيش بدونها لابإيدي ولابإيدها

          يازمن ما بتنسى اصلك حالتي قايلك إنتَ ناسي
          لا بتجيب الفرحه عُمرك لامره هونت القواسي
          لمَّا عشتا عيون جميله وفيها رسِّيت المراسي
          جيت تبكي الفرحه فيني زي شموع باكيه الاماسي

          ولمَّا نحنا بدينا ريدنا اصلو ما قايلين بنشقى
          كننا قايلين قدري نيتو كلو زول في الدنيا بلقى
          تاري لمَّا دروبنا لمَّت لينا كانت خاته فرقه
          واصلو ما قايلين حنانك يازمن بنشيلو حرقه

          ابكي ياعيني فراقها دمعه ما تخليها فيكِ
          والزمان الشالها منك تاني شن خلاهو ليكِ
          ابكي عيشي الدنيا آها في السعاده ولاعليكِ
          ياحليلك وانتِ ضايعه وياحليلو البشتهيكِ

          وماخلاص إحنا إفترقنا وروحت ريدتي البريدها
          قسمه غايتو اعيش بدونها لابإيدي ولابإيدها

          تعليق


          • #35
            هاشم ميرغني "كلمات أغنية ما بتمش"

            ما بتمش

            داير تفوت لي وين تمش ما بتمش
            ما شلناك في الضلوع غطيناك بالرمش
            حرمت عيني المنام..
            كحلت جفني بالغرام..
            ولا مره يوم شفتا الشمش
            ما بتمش..

            البحر بعدك بجف
            والزرع حزنان نشف
            اخاف تغرق في عيني ياجميل..
            لمَّا تبكيك بدموع فراقك تنسرف
            وانسى الغنا وما يرف طرف
            والعلي ماينعرف
            ما بتمش..

            المحنه الفي القلوب
            ما قفلت كل الدروب
            يا الهواك في قدري مكتوب
            لا بنساك لا بتفوت لا بتوب
            ما بتمش..

            داير تفوت لي وين تمش ما بتمش
            ما شلناك في الضلوع غطيناك بالرمش
            حرمت عيني المنام..
            كحلت جفني بالغرام..
            ولا مره يوم شفتا الشمش
            ما بتمش.

            تعليق


            • #36
              هاشم ميرغني "كلمات أغنية حتى انتِ الزمن غشاك وخنتِ"


              كلمات والحان هاشم ميرغني

              الشقى الفي دربك

              حتى إنتِ الزمن غشاك وخنتِ
              ياحليل ايام عيونك كانو وافين زي ما كنتِ

              والبعذب في الحقيقه إني ما قصرت ليكِ
              كنت بي قسوة ظروفي امشي في الأشواك واجيكِ
              بي فرح بستننا جيتك وابكي دم ساعة مشيكِ
              وبعد طول الإلفه كلو تاني جيت اتغش فيكِ

              والشقى الفي دربك انتِ كنت برضو بحسو راحه
              والسنين الضاعو مني كنت رضيان بي رواحه
              إلا هسه خلاص عرفتك والعيون شافت صباحا
              مهما اشتاق لي عيونِك ما بفكر في سماحها

              حتى إنتِ الزمن غشاك وخنتِ
              ياحليل ايام عيونك كانو وافين زي ما كنتِ

              تعليق


              • #37
                هاشم ميرغني "كلمات أغنية عندي كم في الدنيا زيك"


                كم في الدنيا زيك

                عندي كم في الدنيا زيك لما تزعلي مني انتي
                انتي جرحي الما بيبره حتى لو من عيني غبتي

                قلبي قبلك ما اظنو لحظه من ايامي عاشها
                بي عيون الدمعه بصبح وينسى راحل زي فراشه
                يوم رضيتي علي وجيتي طللا فوق عيني دعاشه
                بيكِ عيَّد قلبي دابو غيمة الريد جاتني راشَّه

                لما ارحل بي خطايا قلبي ما برحل معايا
                اصلي بس خليتو ليكِ إبقى عَشره عليك ورايا
                وعيني عاد كان شفتي بعدِك ما بتوالِف غير بكايا
                اصلي في ريدك غرقت وناوي اغرق للنهايه

                يا سلام لو شفتي حالي يوم تجيني رساله منِّك
                بنسى ظلم الدنيا كلو ولي حروفك احكي عنِّك
                ما عندي هم في الدنيا غيرك لو وحاتك زدتي حنِّك
                عندي كم في الدنيا زيك لما تزعلي وللا إزعل قلبي منِّك

                عندي كم في الدنيا زيك لما تزعلي مني انتي
                انتي جرحي الما بيبره حتى لو من عيني غبتي

                تعليق


                • #38
                  هاشم ميرغني "كلمات أغنية كنوز الدنيا"


                  كلمات والحان هاشم ميرغني

                  كنوز الدنيا

                  لو كنوز الدنيا راحت صدقيني روحتها ما بتأثِّر
                  انا إشتريت بيك عُمري كلو ما في غير فقدِك بخسِّر
                  لو عجزت النظرات تعبِّر خلي الغُنا البكَّاي يفسِّر
                  ولو وهبتِك عُمري كلو تلقيني في ريدِك مقصِّر

                  اصلي من شفتِك وحاتك ناوي ابنيلك خميله
                  لي جمال ما شفنا زيو لي عيون نادره وكحيله
                  خوفي تبقي زي ندرة عيونك بالوداد دايماً بخيله
                  تنسجي الأزهار عقودِك وتبقى شوفتِك مُستحيله

                  الغنيوه الحلوه ضاعت والحروف بِصعَب اقولها
                  ما كنتِ في عيني نجمه في سماها بَعيد وصولها
                  بقيتي في عيني دمعه لي سواكِ صَعب نزولها
                  العيون ما شايفه غيرِك كفيفه لمَّا إفوتها زولها

                  لو كنوز الدنيا راحت صدقيني روحتها ما بتأثِّر
                  انا إشتريت بيك عُمري كلو ما في غير فقدِك بخسِّر
                  لو عجزت النظرات تعبِّر خلي الغُنا البكَّاي يفسِّر
                  ولو وهبتِك عُمري كلو تلقيني في ريدِك مقصِّر

                  تعليق


                  • #39
                    هاشم ميرغني "كلمات موال جنيت"



                    كلمات والحان هاشم ميرغني

                    موال-جنيت

                    ما تصدقيهم لو قالوا ليك جنيت
                    ما انا بعدك ما عندي عقلاً بيهو أجِن
                    جنيت..جنيت..جنيت
                    ما تصدقيهم لو قالوا ليك درويش ومِودِّر اسمو في فقدِك بإن
                    إكتب قصايدك ليلو كلو إكتب حروفك وإندفن
                    جنيت..جنيت..جنيت
                    وجيتي تسأليني شن سويت
                    انا ما طوَّعتو حَرفِك وبي جفاك غنيت
                    عزفت هواك شراع مكسور وشهَّقت انفاس الغرَق دوبيت
                    جنيت..جنيت..جنيت
                    رسيت ليك من غير مراسي وشط لاخُفتَ غضب الموج ولا إضَّاريت
                    بس خفتَ العمر يمشي وابقى مرسيَّه لي زولاً صِبح ياريت
                    انا طول عمري كنت ليكِ نعم وما عِرفتَ ابيت
                    جنيت..جنيت..جنيت

                    تعليق


                    • #40
                      هاشم ميرغني "كلمات أغنية نسايا عيونِك"


                      نسايا عيونِك

                      نسايا عيونِك نسايا
                      ديل ساقنِّك ورحلَن بيك قصدن ازايا

                      يا الماحنيتي على سهري ويا الشلتي دموع عيني وصايا
                      انا اكتب فيك اجمل شعري اكتب في عيون اجمل آيه
                      لو ما الأيام الخانتني البلد السايقو في ورايا
                      خانتني الدنيا وراكِ بقيت ابكي المي واسايا

                      نسايا عيونِك نسايا
                      ديل ساقنِّك ورحلَن بيك قصدن ازايا

                      تعليق


                      • #41
                        هاشم ميرغني "كلمات أغنية وبقيت بتلوم"



                        كلمات وألحان هاشم ميرغني

                        وبقيت بتلوم

                        وبقيت بتلوم عاشقاً بيك شَقي ومهموم
                        إغنِّي عليك تراتيلو إغفِر ذنبَك وهو المظلوم

                        اغالط نفسي واقول دا خصام
                        وخصام الريد ما بدوم ايام
                        حِن على قلبي من الآلام
                        يا الرايدنك وكم فاقدنك وما بتتلام

                        يا أرقَّ صباح في العيد بنصابحو
                        تآسي في زولاً وانتَ الجارحو
                        دمع العين السايل فاضحو
                        عشان غناكَ حَقو تسامحو

                        بلقاك في عيوني ربيع وتشرقي في عيوني صباح
                        بلقاك مهما طال ليلي وتشرقي في عيوني صباح
                        بلقاك طلَّه في ليلي وتشرقي في عيوني صباح
                        بلقاك في الربيع نسمات وتلبسي من قصايدي وشاح
                        بلقاك مهما تجفيني وتغيبي علي بالأفراح
                        بلقاك مهما تجفيني وتنسي معاك ِعمري الراح
                        وبلقاك كلمه في خاطري أغنيها ووراك ارتاح

                        وبقيت بتلوم عاشقاً بيك شَقي ومهموم
                        إغنِّي عليك تراتيلو إغفر ذنبَك وهو المظلوم

                        تعليق


                        • #42
                          هاشم ميرغني "كلمات أغنية قدُر فتشت"

                          كلمات وألحان وغناء هاشم ميرغني

                          قدُر فتشت

                          قدُر فتَّشت ما لقيت لي شبه ساكت مقارب ليك
                          اتاريك بي قساوتك ديك
                          حَنان الدنيا كُلها فيك

                          اقول للناس نسيت ريدك ولا شاغلاني ذكراكِ
                          افتش دنيا غير دنياك ألاقي الدنيا دنياكِ
                          وعلى الدرب المشيناه زمان لسه خطايا راجياكِ
                          تكوني نسيتي كل الكان اريتني قِدرتَ انساكِ

                          وصدقي في بعادِك لي درب للفرحه ما لاقيت
                          لا دوبني بعدِك ريد ولا لعيون حُنان غنيت
                          قُلت وراكِ حأفرح يوم ياما كتير وراك شقيت
                          بعد لميت خطاي منك شنو الخلاني هسه جيت

                          وبعدِك كيف إكون حالي لمَّا يجيبو سيرتِك لي
                          مره بَلُوم زمن غدار ومرَّه اللوم بجيبو عَلي
                          بس ياريت الزمان إقبل تاني لي دنياكِ إرجع بي
                          منو القال ليك نسيت ريدِك ما ريدِك شايلو في عيني

                          قدُر فتَّشت ما لقيت لي شبه ساكت مقارب ليك
                          اتاريك بي قساوتك ديك
                          حَنان الدنيا كُلها فيك

                          تعليق


                          • #43
                            هاشم ميرغني "كلمات أنت كنتا وكان زمان"

                            كلمات وألحان وغناء هاشم ميرغني

                            كان زمان

                            انت كنت وكان زمان
                            إتلاشت صور الحبيبه
                            والسنين الباسمه راحت صدقني ما بقدر اجيبه
                            ضاع معاك كل الأمل بعدو الأماني بقت صعيبه
                            لا لقيتني قادر احتمل لا لقيتك الفرحه القريبه

                            وإتكسر المجداف حزين والريح بكت فوق الشراع
                            نزلت دموعي تبلِّلُو لما الحلم من عيني ضاع
                            ما كنت قايلك زي سراب بي موجو بسقيني الخداع
                            داير افوتك وارتحل لازاد معايا ولامتاع

                            وينو سهري العشتو فيك ما كنت اسعد من معاك
                            وريتني اكتب في الألم واتوسد الأسى والهلاك
                            فتش علي تلقاني فيك إللا قلبي الما لقاك
                            تنساني زي ما ردتني وما عاش وراك قلباً نساك

                            تعليق


                            • #44
                              هاشم ميرغني "كلمات أغنية الغناوي"


                              الغناوي
                              كلمات والحان هاشم ميرغني

                              بكره راجع للغناوي..للحكاوي..للحروف الليك بتحكي
                              عن معاناتي في بعادك وكيف وراك لي الليل بنشكي
                              صدقني من شوقي ليك لاعرفت افرح وللا ابكي

                              لاعرفت اكتبو كالزمن لمَّا إرجع إجيب فراقو
                              ولاعرفت اكتبو كالزمن لمَّا بيهو الناس بلاقو
                              وللا افرح لي قليبي بي رجوعك لإشتياقو
                              اصلك الزول الحسدني عليهو زمن الفرقه ساقو

                              جايينا يالغيم البفرِّح كلِّ زرعاً في انتظارو
                              انت يا الشايل رزازك في الرسايل اللينا زارو
                              انت يا الحرف المنوِّر الدموع بي وراك سارو
                              انت يا بهجة قليبي في البعاد المُر ودارو
                              انت يا الزول المسافر العمر ضاع في انتظارو
                              اصلي ما الزول البريدك زول بيطفي بي دمعر نارو

                              وبكره راجع للغناوي..للحكاوي..للحروف الليك بتحكي
                              عن معاناتي في بعادك وكيف وراك لي الليل بنشكي
                              صدقني من شوقي ليك لاعرفت افرح وللا ابكي

                              تعليق


                              • #45
                                هاشم ميرغني "كلمات أغنية ضل ضفايرك"

                                ضل ضفايرك

                                كنت غايب وضل ضفايرك هجعتي وراحت رؤاي
                                وكم تعب في الغربه وتري وردد الشقى في غناي
                                احلامي ما كانت ضفاف في الغربه تزهر في صباي
                                ولامره درب الشوق بِعد طاريك صباحاتي ومساي

                                ظلمو الحروف المشرقه لو قالو فيك ما صغتها
                                لو اي سكه للفرح في الغربه بعدك شفتها
                                إبقى الكلام القالو ليك ظلم الحقيقه العشتها
                                لو ريدك إتبدل خصام انا ريدي ابداً ما إنتهى

                                النجمه في كبد السما شوفيها كيف حاضنه المدى
                                والزهره في حضن الربيع احلامها بس قطرة ندى
                                وحيات غناي القلتو فيك ونسجتو من رجع الصدى
                                انا عشت بي حبك سنين اتلو محاسنك ارددها
                                لو قالو ليك انا ريدي ضاع تلقيهو يادووب إبتدا

                                وكنت غايب وضل ضفايرك هجعتي وراحت رؤاي
                                وكم تعب في الغربه وتري وردد الشقى في غناي
                                احلامي ما كانت ضفاف في الغربه تزهر في صباي
                                ولامره درب الشوق بِعد طاريك صباحاتي ومساي

                                تعليق

                                يعمل...
                                X