محجوب شريف «يا اللي بتسمع والما بتسمع»

تقليص
X
 
  • تصفية - فلترة
  • الوقت
  • عرض
إلغاء تحديد الكل
مشاركات جديدة

  • محجوب شريف «يا اللي بتسمع والما بتسمع»

    يا اللي بتسمع والما بتسمع

    يا اللي بتسمع والما بتسمع
    لازم تفتح أضانك وتسمع
    صوت الشارع لمن يدوي
    كل قلاع الخونة بتهوي
    وكل جباه الكهنة بتركع
    وشمس الحق السرقو شعاعها
    بكرة بأمر الشعب بتطلع
    ياللي بتسمع
    والما بتسمع
    نحن أسودا ما بتِدجن
    ونحن سدودا ما بتهدّن
    ونحن جبالا ما بتِتصدع
    لملم ناسك ولحمة راسك
    وارفع ايدك عننا ارفع
    يا اللي بتسمع
    والما بتسمع
    لو بي بنادقك ما بترهبنا
    ولو بى خنادقك ما بترعبنا
    *****
    والتاريخ يا جاهل بيشهد
    والأيام لسع بيناتنا
    وكل الحق الضايع بيرجع
    يا اللي بتسمع
    والما بتسمع
    أسأل كل العسكر قبلك
    وكل الحاول فكر متلك
    الاستأسد والاتنمر
    مهما استعلا ومهما استكبر
    برضو في يوم الغضبة بيهلك
    وبيلقى مصيرو نفس المصرع
    واننا نحنا أمة عظيمة أصيلة
    لينا خصايص ما في مثيله
    وفينا طباع بالفطرة نبيلة
    والاسلام ما جانا الليلة
    ولا أخلاقو علينا دخيلة
    الايمان من بدري سبيلنا
    والقرآن في الصدر دليلنا
    أنقى وأرقى وأسمى وأرفع
    يا اللي بتسمع
    والما بتسمع
    نحكي اليك لو كان ما بتعرف
    حاجة بسيطة عن ماضينا
    نحنا رضعنا الثورة رضاعة
    وبالوطنية أنِحنا ربينا
    التدجيل ما بنفع فينا
    والتضليل ما بيمشي علينا
    أنِحنا عبرنا السكة مشينا
    وشفنا عدونا وشفنا صفينا
    وما بنهاب لا سيخ لا مدفع
    يا اللي بتسمع
    والما بتسمع
    الانقاذ ما بالدبابة
    ولا أحلام شايلاها سحابة
    ولا أوهام عالم كضابة
    ولا أرقام خاوية وخلابة
    والاصلاح ما جربندية
    الاصلاح ما بالزندية
    الاصلاح عدل وحرية
    الاصلاح موضوع وقضية
    الاصلاح عزقة وطورية
    يا اللي بتسمع
    والما بتسمع
    نحن اولاد الوطن الواحد
    متسامحين من يوم ما قمنا
    عشنا حبايب ولسه حبايب
    ما اتخاصمنا ولا اتصادمنا
    فينا مساجد بي تهليلا
    وفينا كنايس بي انجيلا
    وفينا معابد يسرج ليلا
    ربنا واحد وشعبنا واحد
    وحبنا واحد ودربنا واحد
    يا اللي بتسمع
    والما بتسمع
    دايرين نختم نحن كلامنا
    ودايرين نحسن نحن ختامنا
    للأحرار نديها تحية
    وللثوار تعظيم وسلام
    نحن الفوق الشمس مقامنا
    ونحن جبين الشمس مرامنا
    ونحن وقود الحارة ونارها
    ونحن منية الباغي سهامها
    الا ارادة المولى ارادت
    حكمت فينا وفي حكامنا
    بعد ما أزهري كان هو زعيمنا
    بعد الدرر الزانو زمانا
    جات البقرة عشان تحكمنا
    والرقاص بقي يكلمنا
    جل جلالة الملك الواحد
    يأتي وينزع
    ويعطي ويمنع
    ويخفض ويرفع
    يا اللي بتسمع
    والما بتسمع
    يومك قرب يا ظالمنا
    وبكرة حناخد منك تارنا وما بنرجاهو حساب الآخرة
    داكا حسابا من غفارنا
    يمكن يصفح ويمكن يسمح
    ويمكن يعدك من أشرارنا
    الا أنِحنا حسابنا براهو
    يوم الحارة بنوقد نارنا
    تحصد كل الداسو حقوقنا
    تحرق كل الخربو ديارنا
    دايرين نعرف وين شهدانا
    دايرين نعرف وين أبرارنا
    والآلاف الشردتوها من خبراتنا ومن أخيارنا
    والمؤتمرات الدبلجتوها من اخوانا ومن اعمارنا
    نحن عرفنا البئر وغطاها
    ونحن خلاص قررنا قرارنا
    ونحن حنضرب كل العملا
    ونحن حنصلب كل الجهلا
    ومن الباغي حناخد تارنا
    وعالية ترفرف راية العزة
    وغالية عزيزة حترجع دارنا
    ونور الفجر القادم يسطع
    يا اللي بتسمع
    والما بتسمع .

    محجوب شريف
يعمل...
X