الفاتح حمدتو «ام درمان»

وتاني نغني لي أم درمان
وتاني نغني لي أم درمان ..
وليها ندوزن الألحان ..
وكان عِشنا العمر كلو
قضينا نقيسا بالميزان ..
نلقى ام در هي أم الدنيا
ما بتزَعزَع الإيمان ..
وما بنلقى البديل والله
إلا في جنة الرضوان ..
****
سلام يا ام در بعد غيبة
سلام العاشق الولهان ..
واصلو الغيبة مهما تطول
بنرجع تاني للأوطان ..
نبل أشواقنا جوَّه النيل
نقابل ناسا بالأحضان ..
نقول ليهم صباحكم خير
وفوق العافية تلقو أمان ..
****
قدُرْ ما قالو قبالنا
وقدُرْ ما قلنا بي تحنان ..
ما بنوفيكي حقك يوم
فيك إتجمع السودان ..
إنتي أصالة التاريخ
وانتي منارة الأزمان ..
وانتي الفيكي كلو نفيس
بيوتِك وطيبة السكان ..
****
إنتي جمعتي كل الناس
وجبتي حضارة الإنسان ..
فيكي العالِم الدارس
وفيكي الرائع الفنان ..
فيكي العامل الكادح
وفيكي الخلوة والقرآن ..
وفيكي بناتنا زي الفُلْ
وفيكي وفيكي برضو كمان ..
****
بوقع ليكي إسمي هنا
واختِم لو طلبتي بيان ..
واحلِف بالكلام القلتو
لا زوراً ولا بُهتان ..
بحبك وافنى في حبك
حدود القُدرة والإمكان ..
وتسلمي يا صباحي أنا
واسلم ليكي يا ام درمان ..