وفاء قاسم « بحلم بى عويناتك »

بحلم بى عويناتك
*************
محالة تغيب عن خاطري
ولو بعدت مسافاتك
ما راجياك من بدري
وبحلم بى عويناتك
ولمن شوقك يغمرني
أعد الثانية ساعاتك
وأحلم بى كلام الريد
وبى جيتك.وميعادك
وديمة على بس بطراك
تجلجل لى..ضحكاتك
وتسرى الريدة فى دمي
وأحس بكل..لمساتك
أنا السهرانة شايلة الليل
بعّد فى نجوم سماواتك
وكل ما تمر سحابة صيف
يجينى رشاش دعاشتك
أحس بالدنيا بسمت لى
وأهدت لى. بسيماتك
آه لو تدرى يا غالي
كم إشتقت لى صوتك
ولى عطرك ونسماتك
وبعد الحال أريتو الحال
يقدرنى
عشان أوصل مقاماتك
وأكون في الدنيا بس
هيمان وما طمعان
وفيك عشمان
عشان أسمع همسة ريد
وتحنو على بنظراتك
أنا الشقيان وبس تعبان
وما قادر علي فراقك
أنا السائل عليك ديمة
وروحي تدور في مدارك
ومهما جارت الأيام
بعيش الريدة من تاني
وتلقانى فى خيالاتك
حبك بس كتل قلبى
ولو فتشت فى جواك
تلقى الحب دة متحكر
فى كل ظل مساحاتك
في كل ظل مساحاتك