عائشة عابدين« حلات يمه »

حلات ضحكتنا وحلات اللمة
وحلاتك يمة ياروعة
ويا احساس يلم احزانا
ويدينا شموع افراحنا
فى بسمة
حلاتك يمة وحلات شمسك
وكت تلسعنا عشان ندفا
وعشان نتلما فى عيونك
ومهما يكون لا احزان
ولا الام بتكسرنا
دوام يدينا مترابطين
ونجبر فى كسورنا سوا
وفى احساسنا متناغمين
ومنك انت يايمة
يا الديمة زايدة حلا
وزايدة غلاوة فى قلوبنا
نشتل فى ربوع قلبك
ايامنا واحلامنا
ونتهافت على شوقك
ونتصارع على حبك
ونتلما حواليك
وانت البلبل الصداح
يا يمة يا مرتع الاحساس
يا ضحكة مغزولة
من حنين النيل
يا السحر الاصيل وبديع
يا القلب العليهو كتير
لاملّ ولا كل
ولا جف الحنان منو
ولا قل الجمال عندو
لانو فى الاساس عنوان
ولانو لى سمانا غمام
ولانو حلاتنا منو دوام
يايمه يا الديمة
زايدة حلا