تويت
حيدر الشيخ «فتشت عنك يا صباح في الصباحات الوجوه»
فتشت عنك يا صباح .. في الصباحات الوجوه ..
فتشت عنك يا صباح .. في حديث الناس..
وفي الكلمات .. معاني .. ورديفة
في صباحات البيوت .. سِحن ..شاهي اللبن
والمغموسة .. فيهو .. قرقوش رغيفة
وفي الأسمال البالية .. الضاحِك ..
عليها.. وفيها .. بَرداً .. قالِد معاهو .. زِيفة
وفتشت عنك .. في الواهنة .. باهتة ..
عيون .. المشردين .. مُتعَبين .. كسيفة
في الأماسي .. والمآسي .. والحكاوي ..
تشرق .. تغرب .. وإن بدت .. سخيفة
فتشت عنك .. في خطاوي .. العاشقين
إمشو واقيفو .. والسعادة .. وصلو قيفة
باريتك .. فراشات .. ندى ورحيق أزهار ..
والأشجار .. أغصان .. ظلاله وحفيفة
بهجة الأرض .. لبست .. ألوانه ..
سبحانو ربي .. صعب .. توصيفة
وفي هجعة القرى .. النامت تعب ..
والقمر .. يغازل .. فيها ليالي صيفة
في الوجوه .. الفقيرة .. السيما التعفف
قسوة الحياة .. المعيشة .. وتكييفة
لمحتك .. في وجوه الشيوخ .. تجاعيد ..
ألا ليت الشباب .. والحكاوي الطريفة
وعند ستات الشاهي .. ريحة البن..
القهوة المزاج .. والقعدة .. الكيفة كيفة
وفي النفوس .. الما بتعرف .. خباثة..
من شلالات .. البراءة .. دفاقة .. ونضيفة
وفتشت عنك .. في تريانة .. العيون الندية
.. البطر.. أي نعم .. ظريفة
وعنك .. ما سألت .. فطيت .. ناس الهبرو مَلو ..
والبطون .. هل من مزيد.. تعليفة
وإن كان سيد الرايحة .. والله ..
بفتش .. في كل حِتة .. وما مطلوب حليفة
قريتك .. كلام فضفاض .. نفخاً ..
ما عندو معنى .. في كم صحيفة
وسمعتك .. تصريح .. عند كم مسؤول
كلام معسول .. وريحتو جيفة
لمحتك .. صافية لبن .. بين الصحاب
أنفاسهم .. قامت .. وألفاظهم .. عنيفة
فتشت عنك .. في الجمال .. الما بعدو ..
ولو .. بعد سنين طوال .. وصيفة
في الضحكة .. الجالت خاطر .. عند
البعض .. حلم .. حمام .. صابون وليفة
وفي آمال الشباب .. الشُغل .. الحب
الأُسرة .. البيت .. وظلالو الوريفة
فتشت عنك .. وفي بحثي عنك .. نضمتك
من حُجاي .. وهمسك معاي .. توليفة
وفتشت عنك .. في أماني الدنيا .. الزايفة..
زايلة .. وفي جوفنا .. زايد .. نزيفة
البعض قايل نفسو .. رَوْض قِرونه ..
وحلف يمين .. عِرف يقين .. تصريفه
سألت عنك المدن الشبعانة وهل مزيد شرفانة
شرهانة جعانة وبالعة من زمان جواها رِيفه
أحواله .. أهواله .. النازلة فيها .. ومافيها ..
فيها .. حابسة الأنفاس .. خايفة .. ومخيفة
إتأملت الغيد .. تمشي وتقيف ..
ضاحكة .. تتوانس .. تتهامس .. لطيفة
أرضاً بِِكِر .. ولهانة .. عطشانة ..
هيمانة .. تحلم .. بي عريسه .. وكريم خريفة
عِشِمتك .. معاهن .. وراهن .. وفي
ملامحن .. جواهن .. شُفتك .. بهية وشفيفة
إحتجتك بصيرة .. ناغمتك .. ناجيتك..
ناديتك .. ساعة القلوب .. غدت كفيفة
فتشت عنك يا صباح .. في الصباحات
الوجوه .. المَحبة .. التتحبة .. وأليفة
حبيتك .. غيمة .. وقيمة .. ولِقيمة
ناس عدمانة .. لكن .. أمانة وشريفة
لمحتك .. إشارة .. بُشارة .. آية .. جاية
في العيون .. السماحة .. لماحة .. وحصيفة
سايس الدنيا .. إن دافرة جاتك .. صِعاب ..
وفي المتلاطم .. عُباب .. لابد تجديفة
وبعدها .. إن داروكِ .. نور .. نورِك .. ليس إلا ..
وإن داروكِ .. نار .. نارِك .. والتنقد الرهيفة
