تويت
حمزة يوسف «أنا كُتَ وين؟»
أنا كُتَ وين قًبّال تجي ؟
وريني وحياة الحنان
المن زمان كان مختبي
هل كُتَ في غيهب شجون ؟
أم كُتَ في خاطرك ظنون؟
أنا كتَ جنبك يا حنون
بس أنتَ ما كُت حاسَبي
أنا كُتَّ في رحم المحن
مولود خديج هزم الزمن
ما كمّل التسعة العدال
وقال بي عناد لازم أجي
بي لهفة ختفتني الظروف
بي قسوة ضاديت الوكت
حاربني بتار السيوف
سلّمت مجبور منتكي
أنا كُتَّ في نفس المكان
العب لعب واسكب حنان
انا كُتَّ في عقل البطان
شايلني شيلُن لي شليل
ضاميني ليل
فرحان مُحُمد ومنتشي
لمن قدر يختف شليل
يجريبو يمشي يميِّسُو
انا كُتَ عرقان في إيدي
انا كُتَ في لوبي الجرف
بعد النضار هضلم نشف
جاهو العصار شايل الغبار
بعدو البحر سَجَّم وشي
انا كت في وقت الحصاد
شايل مواعين الفرح
صبحي النهار ونهاري ليل
والليل سُقُد مافيش رقاد
بس للأسف ما جبتا شي
انا كت قاعد منتظر
شاهد على كل اليمُر
احلف حلف
واقسم قسم
وعليّ يمين
ما شفتا شي
انا زول كدي
ما بيختشي
حبوبة ترفع للايدين
زعلاني جد من فعلتي
بكل قواها وقُدرتا
تنهر تقول أها هاكا دي
