تويت
بت مها رامه
بِتْ مَهَا رَامَه النَّبْلَهَا إتْرَامَى
الفِى جُوفِى نَار ضَرَّامَه
جَنَّة الرَّامَ جنَّةْ المَفْرُودْ
وَاجبْ إكْرَامَه
مُتْعَة العَافْيَه الكُلَّ حَى رَامَه
فِى جَبِينَه تَوِجْ فَصْدَه فَرَّامَه
عِيُونِى جَمَّامَه وكَبْدِى بالعَبْرَاتْ
لَيهَا تَمَّامَه
قَادَتْ المَبْرُوعْْ يَزْدَرِدْ جَّامَه
عِبَارَه عَنْ مُهْرَه مِعَانِدَه لِجَامَه
مَاضِيَه سِهَامَه كالعِبَايَه الدِّيِسْ
مَالْ باسْهَامَه
النَّواصِلْ فُوقْ رِدْفُه تَتْرَامَى
يَابَا شَيخ إدْرِيسْ فُوقْ جِدَى رَامَه
رَاقْيَه خُدَّامَه ضَامْرَه مَهْدُولَه
عَالْيَه أرْدَامَه
مِنْ قَدِيمْ شَانَه عِزَّهَا مُدَامَه
خِلِّى خَشْمَ البَيتْ مِشْتَهِى أقْدَامِه
عَامَتْ الفَخَّه تَفْجَعْ الوِزَّه
ودَاهيْهَ فِى اللَّخَّه
تَنْطَوِى بُرْصًه تَعْلَى تَتْمَخَّى
والفِصَّيدَه تقول للزُّمَامْ إخَّ
كَابِى حِرْتِيهَا مَايْحَه تِتْحَلْحَلْ
دَايْخَه مِنْ تِيهَا
رُخْصَه تِتْهَبَّعْ رِدْفَهَا عِتِيهَا
دُمْتِ يالعَيبَه شَيشِكْ أرْتِيهَا
شُوقِى لَى لِيمُه الحَشِيمْ وعَفِيفْ
هَاوِى تَكْلِيمُه
المَكَتَّلْ طَالْ دِيسُه هِضْلِيمُه
زَى رِيَاشْ كَفَّيْه قَاجِّى إقْلِيمُه
دِيسُو فِى دِرْعُو مِنْ حِجَابُو يَمِيلْ
خَيزَرَانْ فَرْعُو
جِيدُه جِيدْ غُزْلانْ فِى العَسِينْ بِرْعُه
والنِّهَيدْ رُمَّانْ مَا أنْهَشَمْ ضَرْعُو
ثَغْرُه تَبْسِيمُه ضَاوِى والمَمْنُوع
قَطْعِ تَلْثِيمُه
فَاحَ كالنَّدِّ جَانِى تَنْسِيمُه
مَا بَجِيبْ إسْمُه بَخْشَى تَقْسِيمُه
رَتَلتْ السَّالِكْ مِوَسِّدَه النَّاصلْ
عَيبَةْ المَالَكْ
دِرْعَهَا إتْعَنْقَل شَاطَرْ الحَالَكْ
يَا سَلامْ رُخْصَه وبَارْعَه فِى ذَلَكْ
قُومِى سُرِّيهِنْ عُومِى سُوحِى
عَلَيكْ الله ورِّيهِنْ
جَمِّعِى الحَزَّازْ ثُمَّ فِرِّيهِنْ
تَنْضَجْ السِّتَّه الخَافْيَه تِبْرِيهِنْ
مَخَضَّبْ الرَّاحَه مَنْبَتْ السُّومِيتْ
أينَ يَالرَّاحَه
تَلاحِمْ أكْتَافَه أرْدَافَه بالرَّاحَه
عِشْتِ يَالمَتْنَه المِيَّه شُرَّاحَه
