تويت
المعلمات
شُوفْ المُعَلَّمَات أرْوَاحَهِنْ هَمَّامَه عَالْيَاتْ النِّفُوسْ مَالِكَاتْ لَزَمِامَه
شُوفْ الوَاحدَه تَتْفقَّد حَمَامَه حَمَامَه تَزْجُره إن تَلاَشَت وأهْمَلَت حَمَّامَه
أهَنِيكَنْ جَمِيعْ أُمَّاتْ البَنَات الجُمْلَه إنْتَفضَنْ بَنَاتْكَنْ مِن الوَسَخْ والخَمْلَه
مِسَرِّحَاتْ شِعُورِن صِفَة الجَّمَالْ مُكْتَمْلَه يَا بَخْت العَرِيسْ ذَكَا ونَظَافَه وعُمْلَه
دِيك تَفْصَلْ ودِيك تَخْيَطْ ودِيك تَطْرِزْ ودِيك فِى البَيتَ تَنْظَفْ للأوَانِى تَفْرَزْ
فَاضِى البَالْ حِلَيلَه تَشُوفُو بَرَّه مِبَرِّزْ تَشُوفْ ودَ عَينَه رَايقْ زُرْقُه مُو مِتْعَرِّزْ
المُدَرِّسَه للبِتْ نَاظرَه بَهْجَه ورِفْعَه بَى نُورْ العِلْمِ الدُّفْعَه بَعد الدُّفْعَه
المَرْأَة بِدُونْ عِلْمِ كَيفْ تَكُونْ مِنْدَفعَه شُوفْ النَّاظْرَه فِى تَعْلِيمَه كَيفْ مِنْدَفْعَه
عَقْلَ النَّاظْرَه عَقْلَ الرِّجَالْ القُدَّرْ كَمَانْ فِى الرِّجَالْ المُخْلِصِينْ النُّدَّرْ
غَرِسْنَا اليُومْ نَتَجْ ونَبَاتْنَا حَازَى وخَدَّرْ المُتْعَلِّمَه قَطْ فِى فَارْغَه مَا بِتَتْشَبَّرْ
كَسَاكْ نُورْ العِلْمِ هَيْبَة وأيْضَاً صَانِكْ عِند الإمْتِحَانْ يَاسَمْحَة سَابْقَه حِصَانِكْ
نَرْجُو الله يَعَجِّلْ بالقِرَآنْ إحْصَانِكْ وإنْتِى ياالنَاظْرَة مَا بِنَقْدَرْ نَفِيكْ إحْسَانِكْ
