تويت
ياخلاى ليل
يَا خَلاَى بَرِيدْ مِنْ بَاهِى الوَرِيدْ
نَظْرَة والعَشُوقْ يَفْعَلْ مَا يُرِيدْ
يَا خِلاَى لَيلْ تَجْمَعْ بَالحَلِيلْ
شُوفْتَه يَا سَّلاَمْ هَذَا أهْنَأ لَيلْ
شُوقْ قُلْ هُوَّ قَامْ مَرْبُوعْ القوامْ
يا مَولاَى زِنْ حَالاً لَه دَوَامْ
يَا المَرْيُودْ نَعَمْ إنَّكْ فِى نِعَمْ
إنْ شَاء الله تَدُومْ عَلِيكْ وتَزِيدْ فَى نِعَمْ
يَا المَرْيُودْ تَعَالْ زِيدْ النَّارْ شِعَالْ
خَلِّينَا النَّشُوفْ فَشِيقْ فِى فِعَالْ
قَامْ مُتْخَلِّصاً إيْدِيَه إتْمَلَّصَنْ
مَالْ حَتَّى كَشَفْ البُوشْ كُلَه صَنْ
زُوزِى وجَانَا مَاشِ صِرْنَا فِى إنْدِهَاشْ
حَاكِى بُه الصِّدِيرْ مَرْوحَة القُمَاشْ
عَنْدَه تِرِتِّلَه ثُمَّ تِخِنْتِلَة
والايَدِينْ عَلَى جِسْمُه مَكَتَّلَه
الوَجَه إمْتَلاَ وبَالخَدْ إجْتَلاَ
والفَمْ المِتِلْ شَقَّاتْ الكِلاَ
العَيُونْ مِرَاضْ والشِّلُوخ عُرَاضْ
الفَاسُوخْ يانَاسْ الشَّبْ والقَرَضْ
العِيُون قَرَارْ بِمْشنْ فى قَرَارْ
إن وَحَّيتْ بِطِيرْ مِن صَدْرِى الشَّرَارْ
أتعَرْجَن يا سَمِح مَقْصُودكْ سَمِحْ
مَخْ البَاهِى زَىْ لَخْ القَمِحْ
الوَجه البَدُر وفِصَيدَاتْ خُدُرْ
بَينَاتِنْ سَكُوتْ والجُّوَّاهُ دُرْ
العَجَب الخَفِيفْ مَا بسَوِّى الزَّفِيفْ
حَامِيهُ الوَضِيبْ الزَّىْ السَّفِيفْ
يا رِيحْ لا تَخُون كُون لَى تلَفُونْ
وصِّلْ لَى سِلِكْ مِنْ العَيلفُونْ
زَى فَرعَ الثِّمَارْ جَانَا الوَالِى مَارْ
شُوفْ دِى بتَدُورْ هَىْ شِنْ العَمَارْ
حَبِيبْ العِقُولْ أتْلَزم النِّقُولْ
عُذَراً يا فِهَامْ مَافِيشْ ياعَقُلْ
حَرْفَ الِمَيه بَان وَاقِفْ دَيْدَبَانْ
عَينْ النَّاْس تَطِيرْ بَالشَّبْ واللُّبَانْ
الزُولْ الحِلُو دِيْسُه مَحْفِّلُه
وقَلْ وانْقَلَعْ الصَّفْقَة تَجْفِّلُه
بَاهِرْ كَشْمَتَكْ جَلْتَ بَسْمَتَكْ
النَّقْرَابِى فِيكْ فَايِقْ رَشْمَتَكْ
حُرَّة مُأصَّلَة جَلَّ الفَصَّلَه
الرَّسُولْ يَا نَاسْ شِيلُولَه الصَّلاَة
