أزهري شرشاب «ما أروعك»

ما أروعكْ
ياسامقه زىْ نخل الجروف
مشحونه بى كل الألقْ
ما أروعكْ
مكحوله بى شمس الصباح
رويانه من لون الشفقْ
ما أروعكْ
ياطالعه من وهج الحروف
يافجر جوايا وشرقْ
منداحه منى ومترعه
دفاقه ياكل العبقْ
أنا فى رجاك مشدود وتر
مليان حنين والشوق سبقْ
راجيك تجى
ما قبلك الأيام جفاف
والدنيا فى بُعْدِكْ قلقْ
ياماشه مابين المفاصل والوجع
عاجز لسانى ومانطقْ
ما أروعكْ
حاولتَ أكتب بالحروف
نزفتْ مشاعرى على الورقْ
واللّسه جواى مااتحكى
ظاهر عيان بان فى الحِدَقْ
والجوّه أكبر بى كتير
ماقلتو للناس ما مرَقْ
ما أروعكْ
لو كان زمان الحسره يوم
صادر احلامى وسرقْ
الليله بى وعدك صدقْ
جايانى زىْ نسمة صباح
ريحة دُعاش والغيم طلقْ
خضرة ضفاف كستْ الوجود
والنيل يفيض للخير دلقْ
ما أروعكْ
وأنا راضى لو باقى العمر
فى ريد عيونك إتمحقْ
القاكى فى الخاطر صداى
تلقينى فى آخر رمَقْ
أهتف وأقول ما أروعك
ياغاليه يا القدرك سمق
ما أروعكْ
ياسامقه زىْ نخل الجروف
مشحونه بى كل الألقْ
ما أروعكْ
مكحوله بى شمس الصباح
رويانه من لون الشفقْ
ما أروعكْ