أزهري شرشاب «فرحة اللقيا»

الليله بحلم بيك ربيع فى دربى داك يتْمدّه مَدْ
والدنيا تتطاوع تجى وتدينى بيكى كمان وَعَدْ
حتى القدر يفرح معاى ومن العذاب يحمينى سَدْ
والكون خلا ص يصبح أسير يبقالى فيه أنا لىَّ يَدْ
داك السحاب يرشع مطر عِينَة خريف من دون رَعَدْ
والفرحه تفرش للدروب حتى القمر يلبس عِقَدْ
شوفى الشمس سابت دواره الليله ما قصَدَت قَصِدْ
دارت تعاين لى بهاك من نورك إتْ تآخُدْ أخِدْ
فرحت نجومنا دنت قريب شان لى عيونك تبقى نِدْ
وندى الصباح الليله عاد يآخد نداوتو من اندى خَدْ
شوفى الزهور حتى الطيور أنواع عديده بلا عَدَدْ
جايين صفوف بيغنوا ليك حِمير وقمرى وقينقَرَدْ
القمرى ياست العيون فى لحظه للجنحين فَرَدْ
شوفيه داير يحضنك من شوقو ما قلبو إتْهَرَدْ
القمرى ما دايماً حنين بى حنو أبداً ما جَحَدْ
حاضن صغارو مع الصباح كم صلى لى حسنك عَبَدْ
حتى الشجر بعد اليباس مُخْضَر هُو إتكى وسَجَدْ
ونخلنا داك هدل الصبيط وجريدو إتفدّع رَقَدْ
النيل وحاتك تانى فاض من كم سنين ما فات شَرَدْ
حتى الجروف لوبيها قام فوق الضفاف راقد لِبَدْ
الليله ما شفتو الحبيب باللّهفه وكتين لىْ قَلَدْ
توّهنى ساقنى بعيد بعيد فى دنيا مافى سوانا حَدْ
الليله وآفرح العمر ماالليله جيتك ياسَعَدْ
لو كان تكفى وبيك ينوم طرفى المساهر ما غَمَدْ