علي الخضر (السنجك) «طيف الذكرى»

داير قلبى شوفتك ومن لقاك محروم
غالبنى الصبر جبل اليقين مهدوم
من شوقا يفيض جواى يزيد كل يوم
عليك يتلهف القلب المليتى هموم
فى ذكراك مساهر وعينى مابى تنوم
وطال الليل على لاقمرة لافى نجوم
غرقان فى دموعى اخوض ومرة اعوم
ودمعى انا زى خريف الدالى والمزموم
الملم فى شتات افكارى كوم فوق كوم
وكل ما جانى طيف يتشتت الملموم
أصبر قلبى اقولو انت ارضى بالمقسوم
لا تبكى وتقولى انا لا متين محروم
الا تراهو مسكين من زمان مظلوم
ما لاقى اليواسى ويشكى ليهو يلوم
عاكستو الظروف وحظوظو كلها شوم
وخانقا العبرة شان قرب قيامتو تقوم
يزرع فى شتيل ريدا هو قايلو يدوم
على انقلب الربيع صيفا هجير وسموم
تاه فى تيه هويد ريدك براهو يحوم
لا ضل لا نسايما باردة لافى غيوم
كلما جانى طيف ذكراكى تانى أقوم
أصيغ لحن القوافى ذى العقد منظوم
أصف ندى القوام ضامر الحشا المبروم
وكاحلات العيون كيف حاجبن مرسوم
ابداع الله فيك خلانى اصلى واصوم
زاد ايمانى بى الخلق الطبيعة عموم