تويت
الزمان لو طال إن قصر ،،،
للبلد نرجع نستقر
الزمان
بلدي ناسه يعبدوا الله سر
ماب تعرف الغنا من فقر
خضرة واطاته الماب تحر
كابي ضلها مو ضل سدر
الزمان
يا بلد غاشيك " الخدر "
عامرة بالقرآن والذكر
فيكي طبّاب المدستر
(ود عجيمي) يصفي العكر
الزمان
شوقي لي حيشانا الحكر
واسعة ما بتنقاس بالمتر
لي دليبنا البنقر .. نقر
لي سمر بيهو الليل قصر
الزمان
شوفوا داك يفتل يمسر
وداك كسح في النيل مبحر
الحنان راقد بالوفر
ما سمعنا الجنا يتنهر
الزمان
نمشي للبوغة .. ونخدر
نملا جدولنا وينحدر
في الأرض ماب نترك شبر
نطلع السوق نرخي السعر
الزمان
صح جمال بنوتنا يسحر
هن شعاع من نور منفجر
هن دهب شيبون ما صفر
القمر من نورن بغر
الزمان
يا إلهي القيد ينكسر
ليها هون لنا شان نفر
أشكو ليك من شوقي الكتر
قل صبري وأبي ينصر
الزمان
عمري يا مولاي
تب ودر
يا البلد خاطري
بينجبر
إنبسط والحال ينستر
أشدو متل الطير
أقرقر
الزمان
يا بلدنا الشاغلي الفكر
يا الصعبتي ودربك ودر
جيت أصارع الموج ما قدر ..
أصلو شوقك يدفر دفر