قسم السيد عبدالرسول «ناوي القومة»

ناوي القومة
للبلد البغني بلومه
* * * * *
يا بلدي الحبيبة الزومة
يا الأم البقت لي رؤومة
الشوق للعشيرة عمومة
شيخة وصبيتا وحرّومة
* * * * *
مشتاق لي نخيله ودومه
في النيل داك بدور لي عومة
شوقي أن ماب يغب من يومه
ساهر طرفي مابي النومة
كوراك شفعه وغنومه
للحزم التحت ملمومة
للخلوة وصلاته وصومه
لي فرحاً معا عيزومة
* * * * *
يا الله ،، الجمال في الزومة
كلها خضرة شايلي غيومة
دي الياداب صحت من نومه
فايتي العاصمة بي خرطومة
* * * * *
البلد القيافة هدومة
خامي من النعم مردومة
ما داير فراقه ولومه
إلا القسمة شاني هجومه
للناس من زمان معلومة
شوف أقماره حافة نجومة
سيرته بالكرم موسومة
في السودان مكبري كومة
زيها في السماح معدومة
إترقت بقت حيكومة
يا تومة رويحتي التومة
غيرك عيشتي تب مقسومة
* * * * *
بنزل لي دياره أحومه
انظر حنته المرسومة
كاسيه الطيبة ناسه وقومه
فاقت في الجمال .. لي روما