تويت
بريدك إنتى يا بلدى
بريدك إنتى يا بلدى وريدك أصلوا ما بتحاق
بريدك آهة فى قلبى وريدك جوَّة فى ألأعماق
بريدك أحلى كلمة حب وشلالات وداد دفَّاق
بريدك شان شموع ألحب تنوِّر دارنا بالإشراق
بريدك شان لهيب حبِّك سكن جوَّة ألفؤاد حرَّاق
بريدك زى شعاع ألضو برق وسط ألظلام رقراق
بريدك شان طريق وجدك ما بشقُّوا ألصبى ألعولاق
بريدك أغلى كنز ثمين نلملم فيهو كان يتحاق
بريدك درَّة للعارفين وزيِّك مافى فى ألأسواق
بريدك يا دهب خالص وبخت ألكانوا ليكى رفاق
بريدك بسمـة حـنيَّة بـريدك أحـلى ريـد دفَّـاق
بريدك يا حـلاوة ألريد بلاك ما شفنا ليهو مـذاق
بريدك شان أمـل دنيانا فى لمـحة عي.... برَّاق
بريدك ومانى خجلان تب أسجِّل ريدى فى ألأوراق
عشان أنا من هواك مكتول ولى شخصك يمين مشتاق
بريدك ...
بريدك والعـيون باكية وإنت ألفينا أحـلى نغم
بريدك والقلوب شاكية فى زمن ألمحنة عـدم
بريدك إنت يا محبوبتى مـا بقبل حداكى ألـم
بريدك ومن هواك مكروب وكايس ألوصفة وألبلسم
بريدك صوت حنين رنان بيملأ مسامع ألأبكم
بريدك بسمة زول فتان وريدك باقى لينا علم
بريدك يا تراب بلدى وريدنا بلاك نشوفوا سجم
بريدك يبقى لى ريدك زاد فى دنيا كلَّها هم
بريدك وأبقى فى وريدك معين يسقيك مودَّة ودم
وبعد ما أكمل ألدورة أخش جوَّة ألقليب وأسلم
ده قلب كبير ملان ثورة بكلبش فيهو واتلزَّم
وكان درتينى اتخارج تلاقى ألقبضة جد أحكم
وأسـكن فى قليبك تب أسيطر فـيهو واتحكَّم
وأقول لى كل دخيل قبلك يمين كان يدخل أبقى بجم
عشان أنعم براى بيهو سودان إنت زيَّك كم
يمين ألزيَّك إنت قليل ذوق ومحنَّة ريد وفهم
وألماعاشرك والله حياتوا عذاب وآخروا ندم
بريدك يا معانى ألريد وبعدك باقى لينا ورم
بريدك وفى ألختام مشتاق وسائل ألمولى يتكرَّم
يجود باللقيا بيك يا حب نعيش فى رحابوا نتنعَّم
