تويت
تحتك يا شجرة النص
خط واضح يقسم الحلي نص بالنص
فوق يابس تحت رويان
محل اتفرقن الايام سنين راحن وسنين نلقاها لا قدام
شريط بيلف .. يسجل في خواطرو الكان
هناك احمد قعد يحسب سنينو الراحو منو زمان
وكت جاهل وكت طالب وكت بقرأ
آ احمد وكت بكتب علي لوح الخشب
آيات من القرآن
وكت برضع من الدنيا معاني التقوي والإيمان
يقوم بعد الصبح .. احمد .. صباح الخير
لعلك زين .. عشان العين بخور تيمان
وكان يادوب بدأ المشوار .. عليك يا سكة الدنيا الملاني احزان
يشيل خرتايتو في كتفو .. كرارسيو .. واحاسيسو
وعقاب حرفو ..
عشان يفطر من العوان
واسع يا شجرة النص .. تحتك أحمد الإنسان
يحسب في سنين عمرو ويراجع في حياتو زمان
حمارتو الغبشة والساقي جداول الموية والحيضان
تمر الروكة يا احمد قسمة النصبه والتدان
حق الناس حرام يا احمد وأخيرلك بتاكلك النيران
حقوق الجار تشوفا يا احمد والله موصي بالجيران
ويقوم احمد علي الله
ويسكن في رحاب لله وبيوت الله الملاني إيمان
يحب الجار .. يموت في الطار ونار الخلوه والحيران
أحمد يعشق الواطه .. واحمد يزرع الواطه .. واحمد شتله في الواطه
يشرب هو جناينو أقران
يقوم احمد فرع أخضر مخدر بالفرح رويان
مفرهد وشايل الأشواق يقالد أمو بي تحنان
يغطيك الله يا احمد .. ينجيك الله يا ولدي
عشان احمد بلا اخوان
فرع واحد مفرع من شجرة الحن ضلو بيرمي للجيران
وأحمد اسه بتذكر ويحسب في سنين عمرو
ويتذكر ليالي زمان ومنو القام في البلد قدرو
ومنو العرس ليالي العيد ومنو المات في الشتا وحضرو
وكت بلعب شليل وينو وكت برمو العضم يجرو
وكت بينوم مع حسان ويتاقو عليهم الديوان
وابوه يقوم فجر عجلان .. مع الآذان
يصحيهم عشان يقرو ..
وكت بيشيل غناوي الشوق دموع جواه منحبسه
يصل عند الجرف يسمع من التمر الطوال همسه
وكت بطرح وكت بجمع وكت بقسم علي خمسه
وكت بلعب مع العوان كاك الجدعة واللمسه
ويعوم أحمد بحار الذكري والماضي .. وهناك لا شاطئ لا مرسي
ويكبر احمد الشافع بعد وروه كيف يكبر
بعد ربوه بالايمان بعد قاللو احمد هوي
لا تسرق ولا تسكر ..
الا احمد يقوم يرحل .. يفوت يرحل .. يزور العاصمة والبندر
يتوه في زحمة الخرطوم تعجبو حلاوة المظهر
عرف القاعة والنيلين وكيف بعد الصبح يسهر
يغيب أحمد سنين وسنين وما عارفنو أحمد وين ؟
حليل أحمد ..
خلاص يا الحاجي إتغير ..!
خلاص يا يابا داير أقوم ابوه يقوللو .. وين احمد ؟
خلاص انا يا جنايا كبرّ وكيف بتسيبا ام أحمد
وكت تمرق تلاتة أيام تابا وراك عديل تحرد
وكيف بتسيبا يا ولدي تعيش في الغربة تتوحد
وقدر العندنا آ أحمد نعيشبها لا بنمد الليد
ولا بننزله لا بنشحد ..
إلا أحمد مصر يرحل .. رابط رايو واتعند
تنادي الحلي يا أحمد شباب الحلي يا أحمد
بنات الحلي يا .. وولاد الحلي يا ..
امو تقوللو يا أحمد ابوه ينادي يا أحمد
واحمداغرتو الإسفار
باع امو وابوه خلاص .. حلاوة العيش وطيبة الدار
وسافر لي بلاد بره وكان تمن الأهل دولار
ويرجع للبلد تاني ..
بعد سوه الدهب كيمان
ويسأل يا خلايق وين
وينو أبوي ؟؟
حليلو أبوك يا غافل خلاص اتغطي بالنسيان
ليهو الرحمة يا أحمد وليك عزانا السلوان
وينا الحاجة أم أحمد ؟؟
حليل الحاجة يا مسكين عمت ما سكنها الجيران
وتسيل دمعات عيون احمد ويحس بالوحدة والحرمان
تمن الغربة يا مسكين ياهو الحسرة والأحزان
أبوكا يموت وما تحضر .. أمك تعمي ما تحضر
عيش باقي العمر ندمان
ضم الحسرة والآهات
حنس دفتر الشيكات
خلي يجيب عيون أمك
خلي يجيب أبوك المات
يقايض الفرحة بالأحزان
وحليل أحمد
احمد هسه ما احمد .. ازولاً مقلبو الشيطان
يعيش ويموت علي الذكري .. يروح بالدنيا لي بكره
يموت ويعيش بلا أسرة .. بلا أخوان
حليل أحمد وكت جاهل .. وكت طالب
وكت بقرأ ..
آ أحمد وكت بكتب علي لوح الخشب ..
آيات من القرآن