خالد الباشا " موية "

تمنيت ان اكتب لك بعاميتي البسيطة ..واغني واترنح على حبل الاشواق وانتي تتلاعبين بالورقة الاخيرة وتدفعيني الى النار دفعا ..

وانا براااي اكلم في بنات القمرة واتونس واقطع فيك واحلم وأبكي وفجأة اغني ..

إنتي .. زي دخول الموية تحت كاويك اللوبي الطيب .. وبلافجأة تتهجم

وكتير فكرت برااي شنو العلاقة بينك وبين الموية .. شنو هي ؟.

صحي الموية بتشرق وبتهدم وبتموص وبتغرق وبتشرد وتبل ..

لكن الموية برضو ...

بتروي وبتبني وبتبل ..

عارفة العلاقة بينك والموية هو التشابه في اي شي ..

وانتي والموية وانا زي ساقية جحا منك نجي ومنك نفوت ..

لكن انتي موية ؟

في لغتي العامية انتي موية.. انتي لاشيء ..ِِ

ولكن في لغة الطبيعة انتي موية انتي كل شيء ..

مرات وانا افكر فجأة القاك في محلها .. محل القمرة ..

وبرضو اسأل نفسي برااي ..شنو العلاقة ؟

الجمال ؟

انتي اسمح منها

الضياء؟

انتي ابهر منها ؟

ولكن غالبا ماتكون العلاقة هي في الغياب وشحتفة الروح بالظهور التدريجي ..

ولكن القمره احيانا تحدثني عن بلاد تركتها موحشة لتضيء مكان تواجدي

وانتي ..تحدثين غيري عن مكان تركتيه موحش لتنيري مكان غيري ..

كتير اعاين ليك واعاين ليك .. واتمنى شي وااااحد

هو ان افتح عيني واحملك بين جفوني بس عشان لاشمش ولا هواء ولازول ذاتو ..

لكن كتييير كمان ...

افتش لي طريقة تمرققك مني تمرقكك كلو كلو ...

هو ده الحب ؟

زمااان وانا صغروني ..

سألت صديقتي التي سبقتني الى الحب ..

هو الحب ده شنو ؟

قالت لي ببساطتها ..(شي كدي ده )

فهمت اجابتها وانا احدث بنات القمرة عنك ليلا .. ضحكت ..

مرات كتير اكتب ليك على الواطة

اكتب اسمك ..الهبوب تمسحو

اكتب اسمي الهبوب تمسحو ..

مره بليت اصبعي وحاولت اكتب على الرمل وجدتك والرمل علي اصبعي ...

فاحتجت لك لا اتخلص منك والرمل

احتجت للماء