بابكر محمد خير «جيناك يا الرئيس»

جيناك يالرئيس جيناك فرد ومجوز
جيناك أجمعين ساندين ومابنتلز
يوم جانا الرئيس كان الظرف اميز
وقدريش ماتعبنا الليلة نتميز
ما مال لى جهه من دون جهه إتحيز
ولى كل البلد عمر ولا ميز
مو زولا جبان ساعة الهجوم رزرز
ومو يوم القتال دافرنو يتلكز
معروف من زمان شال للتقيلة ركز
ومو زول دنيا خمخم من فناها كنز
فيهو نشوف قيادة سيادة تتمركز
وعينا شايفى فيهو إجرام نخزها خز
يالسيف البينزل فى الرقاب جز جز
يالتنح اللزوم العمرو مابتوز
يالعمر العمارتو أمامنا تتلزلز
يالعمر الامانتو قضاها ما فرز
ياغضب الحليم المنو تتعوز
يالسم الزعاف ضاقك عدوك فز
ياتمساح بدين الفى جزايرو حرز
يالدوشكا البهد أرض الخصوم دز دز
نحسب للإمور قبال يبين النز
وقبال ماتحر من أسه نتجهز
شان يوما التفور تلقانا نتلمز
يوم داك يالعلوج بنجز رقابكم جز
يا كامبو اللعين لرئيسنا لا تبتز
وأحسب لى خطاك قبال تشوف الحز
أوقف كالرجال كان أصلو ليك مركز
زيك زى حقود شال إيدو عينو طبز
جاى تهز رئيسنا ورانا تتقزقز
بنهز الرئيس كان الجبال تنهز
ياود البلوى والبيتزا والماكدونلز
شوفوا أوكابو بين رفقاتو يتوزوز
وشوفوا رئيسنا بين الناس عرض هزهز
قارنو معاى بينن دون سباب ونبز
ويا فرقا كبير بين النمر والعز