إعـــــــلان

تقليص
لا يوجد إعلان حتى الآن.

بابكر محمد خير «رسالة»

تقليص
X
  • تصفية - فلترة
  • الوقت
  • عرض
إلغاء تحديد الكل
مشاركات جديدة

  • بابكر محمد خير «رسالة»

    مهما الزول يخلى بلادو ترقد فى القلوب تزكار
    وإن طال السفر ياصنعاء لابد يرجعوا السفار
    مهما تزيد تطول الغيبة لابد يوم نجيها ديار
    ومن بعد اليباس فى أشجارا تانى تفتح الأزهار
    ترحل بى هجيرا احزانا وتنزل فى السهول امطار
    ويزدان الخضار فى روضا وفوقا تغرد الاطيار
    صد راجع بلادك يابا وكتين ماجنيت ثمار
    وشن فايدت غربتك أبوى حين سويت جناح ماطار
    شن فايدت هدومنا السمحى شن فايدت سماحة الدار
    وكتين سيدا فات خلاها واصبح ذكرى للسمار
    عاين لى نضارة امى دى اليوماتى ناقصى نضار
    من تصبح صباحات الله تمرق ويكتروا الزوار
    خايف فى بعادك ابوى لايقوم الزرعتو عدار
    تايه فى بحار الغربة ماحصلت ليها غرار
    شوفا حياتنا وإنت هناك لات حملنا كوم أوزار
    تعمر دارنا بيك يابوى مو بالبهية تبقى عمار
    بوريك كيف فراقك لينا يقطع فى القليب منشار
    وكم ياكم سؤال أقرانى غرز فى حشاى وغار
    أديك الخبار يابوى خبار ناس البلد والجار
    حمد طه داك البوم الزول العشوق فى الطار
    خلا هدومو ديكى الخرقى تاجر صار
    ود الزينة خلا قروشو قام زاهد مع الحوار
    أم عليوة ود الروضة واقع فى البيوت سمسار
    ديك ولاد سعيد البوشى ابوهن رسل الدفار
    راجل نورة داك فى أمريكا جات ماهيتو بالدولار
    والولد الزمان شاكلتو قرب لينا وأصبح جاار
    صح حال البلد مو صاحى إلا كمان أخير من نار
    نار الفرقة نار الحرقة نار فى صحبة الاشرار
    مشتاق لى ونستك ابوى مشتاق لى وشيك الحار
    يابا عليك الله تجينا داير أفتح معاك حوار
    إن ماجيت أبوى عجلت لامن نحن صرنا كبار
    الشى الشايفو قدام عيى وكت أكبر بكون لى ودار
    ماب تلقانى ماب تلفانى مايفيد تانى أى خيار
    تندم كل حياتك أبوى ترانى أنا قلتلك أسرار
    ولم الليل يطول ينفضى ونرجع لى بيوت الدار
    إنزوى لابعيد لاخوانى وأعزف ذكرتك مزمار
    وأسرح يابا بالساعات وألعن فى عصا التسيار
    وأعاين فى حلم مامات وأنت ورا بحارفى بحار
    تايه يابا كلى جراح شغال فكرى ليل ونهار
    أفتش فى شليل وين راح ما لقيت لى شليل آثار
يعمل...
X