محجوب شريف «حنبنيهو»

تقليص
X
 
  • تصفية - فلترة
  • الوقت
  • عرض
إلغاء تحديد الكل
مشاركات جديدة

  • محجوب شريف «حنبنيهو»

    حنبنيهو
    حنبنيهو البنحلم بيهو يوماتي
    وطن شامخ
    وطن عاتي
    وطن خيِّر ديمقراطي
    وطن مالك زمام أمرو
    ومتوهج لهب جمرو
    وطن غالي
    نجومو تلالي في العالي
    إرادة.. سيادة.. حرية
    مكان الفرد تتقدم
    قيادتنا الجماعية
    مكان السجن مستشفى
    مكان المنفى كلية
    مكان الأسرى وردية
    مكان الحسرة أغنيَّة
    مكان الطلقة عصفورة
    تحلق حول نافورة
    تمازح شفع الروضة
    حنبنيهو
    البنحلم بيهو يوماتي
    وطن للسلم أجنحتو
    ضد الحرب أسلحتو
    عدد ما فوقو ما تحتو
    مدد للأرضو محتلة
    سند للإيدو ملوية
    حنبنيهو
    البنحلم بيهو يوماتي
    وطن حدادي مدادي
    ما بنبيهو فرادي
    ولا بالضجة في الرادي
    ولا الخطب الحماسية
    وطن بالفيهو نتساوى
    نحلم نقرأ نتداوى
    مساكن كهربا ومويه
    تحتنا الظلمة تتهاوى
    نخت الفجر طاقية
    وتطلع شمس مقهورة
    بخط الشعب ممهورة
    تخلى الدنيا مبهورة
    إرادة وحدة شعبية
يعمل...
X