عبدالله محمد خير «كتاب الهوى»

تفاصيل غناى للامل بشرحو
مواويل قليب نظرتك تفضحو
يشوفك سموم الغرام تلفحو
لقاك كل يوم يكتبو ويمسحو
كتاب الهوى الكل حين بفتحو
بعد كنتى سر عنو ما بيفصحو
حروفك نَحت تانى ما بتمحو
نقوش فوق جدار العمر قرحو
مشـــاعر كبار بيها ما بيمزحو
مطَارد هواك بى هواك ينزحو
مصيرهم محال عنو يتزحزحو
تحت وطاءة الشوق اليك يرزحو
عليك فوق دروب الامل يقدحو
يهيمو ويقيمو الزكر يمدحــو
لهيبن زناد... حاجة فيك تقدحو
عذوبة وخصوبة وثمار دندحو
يتوهوو بعيد فى العيون يسرحو
مزيج من شعور يحزنو ويفرحو
يعيدو الحساب يجمعو ويطرحو
يشوفوه دور إنت ما مسرحو
تضاريس قوامك إذا إتمرجحو
يمورو وسماح بيهو يتبجحو
كتير بى محاسن الحسان رجحو
دلال وإعتدال وإغتيال ينجحو
أمل يا أمل كل من صابحو
أمل يارهاب ما بصل سابحو
بيك فحول الكلام ديمة يتنابحـــو
بس ياريت كنتى سوق يحمدو الرابحو
ســؤال يا حبايبنـــــــا لوتسمحـــو
هل يجوز للشيوخ فى الشباب يطمحو
بى بشيش للجواب حتى لو افلحو
يبقى ما افسدو الدهر مين يصلحو