عبدالله محمد خير «مشاوير الفرح»

غريبة مابكت العيون فى يوما داك
لما انكتم نفس القليب ..
الكان بشيل هواء من هواك
* * *
تاهت خطاوى عليك من قبل الوصول
وقفت هناك ...
* * *
ورثت من الزمن الصبر
ممهولة ما سبقت خطاك
مع انو يا القمر الملجلج فى سماك
أطول مشاوير الفرح كانت معاك
* * *
مبهوره ما بكت العيون
مسروره للفرح المعاك
معصورة بالحزن الدفين
مغمورة بى فرحة لقاك
مسحوره بالحسن الرزين
مأموره تنظر لى بهاك
مكسورة تخفيه النين
مجبوره ما رادت سواك
محصوره فى الوجه الحسين
يا صوره من اجمل ملاك
* * *
غريبة انى وقف امام عينيك
وما انهارت قواى !!!
اتجمعت كل المعانى السامية
ديك اللحظة واتحدت معاى
غاية رجاى ...
قيمة وفاى ...
معنى غناى ...
وتمن شقاى ...
يا من وهبتك كل ما مضى
من شابى ومن صباى
أنا هل ظلمتك ؟
أم ظلمتنى ياجميل ؟
لما سبتك لى سواى
* * *
لحكمة ما بكت العيون
الشاخصة فى وجها جميل
حافظ نداى ...
والليلة كاسيهو الشحوب
فى يوم زفاف خاصم هواى
كان صاغية لى صمت العيون
الكان يردد يا ضناى