محمد الحسن سالم حميد «حجر الدغش 2»

الحجر ..
وعاد من جديدْ
أرمى
يا أمى الولودْ
أرمى
لى آخر شهيدْ
...
الحجر
فى المرة دى
أقوى
من عرْق القصيد
وكلّو من شريانّا
يروى
ويربى
بى دم الوريد
وإحنا سمّيناهو
أسوَة
أسوَة بالحجر
الوحيدْ
فوقنا سنّيناهو
يسوَى
طاقة لى بُكْرة
ويزيدْ
وأصلُو باكِر
ما بعيدْ
...
تنْفد الطلقات
ولكن ..
الحجرْ ما عندُو
سِيدْ
تلقى فى كلّ الأماكن
رامى
شاشاى النشيدْ !
فى الخرابات ..
فى المساكِن ..
هو ..
حتّان الحديد
ما فتر ..
من صبرُو
داكنْ
زاهد النفْس
وزهيد
لا يكلّف غير
مواطنْ
حُرْ إرادة
ومدّة إيد
من بَعَد فى التُربة
ساكنْ
تقدحُو الغضْبة
ويقيدْ
...
الصهاينة
شَرَا اليهود
من تَرَب عادْ
أو ثمود
طالما إتحدّوا
السلامْ
طالما إتعدّوا
الحدود
بى ظلامية نظام
إستساغ الغرب
هسّه
ونفسو فى البيت
الحرام !؟
يا صلاح الدينْ
فى لسّه
عافى منّك
فى العِظام
أى فلسطين
ماها قصّة
ننسى عزّها
فى الكلام
وإن نسينا
منو البينسى
مهبط الرسُل الكرام
...
يا حجر
يا فقرى
سدّاً
خُضْرى
فى وش الرمال
يا جَدَع
يا دُغرى
مجدّاً
عالى فوق العالى
عالْ
...
الورود فى الفجر
ندّن
والعصافير كرنفالْ
بيك ربيع الدنيا
دندَن لحنو
من عصب الرجال
يا حجرْ
يا وطنى ..
جدّاً
ماب أخونك
لا
ومحالْ
كان لى فيك
من بدرى
مسْكنْ
يا تواريب الجبال !
ياما كمْ
دفْيتلى بردّاً
وحضَرة الصيد
الحلالْ
وهسّه عائد
جيد لى
عوَداً
بيك
حميداً
خُبْ تعال
بينى والزيتون
فى وعدّاً
يشهد الله
لايزالْ
المراكب بدرى
عدّن..
يا رياح الإحتلال
الصمود أدانى
جلداً
أعلى قُدرة
على النضالْ
ولى حجرْ
دائماً
مدوْزَن بُكرا
من غضب
الرجالْ
وأصلُو باكِر
ما بعيدْ
طالما
تحتى
الحجارة
طالما
فى الجسْمِ
إيد
طالما
فى الجوف جسارة
وبطْن
ما خلى من شهيدْ
رابحة
ما خسرت تجارة
حين بنوك الدمْ
رصيدْ
تالت الحَرَمْين
يا أقصى
رابعن
يا حَجَرْ عَنيدْ
يا نرُوح
الجنة هسّه
يا يجينا
وطن جديد
بأقصى
من سرعة حجر
مُرْ
مَدَردح
حُرْ
عنيد
يا حجر
وحّدنا
فرّق بين حناجرنا
النشيد
كلما نحفر
نغرّق
لى تحت
معناك يزيد
...
حجر الدغُش
فى إيد الغُبُش
يا حجر نجيض
أرميك فى نهرِ
يقوم
يفيض
أرميك فى نار
النار حمَت
لهبَه العريض
يقرُضْ قريضْ
مطّق لسانه
وغمغمت
هل من بصيراتاً
عمَت ؟!
...
هل من تتار ؟
هل من مغول ؟
من أنظمة
روث الأسى
وذبْلَ العقول ؟
هل من فقَر ؟
مصّت شرايين
المطر
قبل النزول ؟
شرقت مَترْ
حَرَقتْ حقولْ ؟
وأول ظهرْ
فى الجو
حَجَر بت الرسول
إتكمّمت كلّ الفصولْ
بأطفال معبيّة
بالنشيد
وعلى الحجارة
إتيمّمت
صلّت شديدْ
لوطن أكيد
منو وجديد
آن الإفول
يا متْرفين
يان الوعيد
فارت جهنم
دمْدمت
ناره الحمَت
هل من يهود ؟
تُرَب السلام
هل من عرب
تَرَب الكلام ؟
هل من مزيدْ ؟
هتف المدى
حتّى المحيط
عصَف الصدى
وكما نريد
...
وأنا يا رسول الله
نشيطْ
رغم التعبْ
شايفك
على ضهر البُراقْ
رادف شهيد
غضبان غضب .
وفى الأرض
طفلة
مدى الفراغ
تصرَخ
عرااااااااااق
يرجع صداها
غرااااااااااق
حرااااااااااق
تلهج .. عراق
تنخج ..عراق
تزهج ؟
تعيد
فى دجلة يلفحه
للبعيد
لى ضمْ شهيد
من دم مراق
تندهلُو
يلاّ من القريب
ناس بيتنا
عازمنّك حليب
بى بسكويت يافا
وخبيز أمى
اللذيذ !!
وأنا يا عزيز
مشوار بسيط
ونسه
وحديث !
فول بى تميس
اغشاك معاك
جيب الكتاب
لا تقول نسيت
وضرورى كلّم ناس
أمك
إنك راح تبيت ؟!
وبُكرا الصباح
برجع معاك
نجى عند صلاة الجمعة
فى فوج الحجيج
يلاّ
إتفقنا .!
من المحيط
حتّى الخليج
ومن العراق
حتّى الفراغ
بينا إتفاق ..!؟
يا الدُرّة
غاااااغ
يا دُرّة
؟؟؟؟
يا دُرّة اليغيظ
يا دُرّة ... رُد ؟
يا دُرّة ... دُرْ ؟
يا الدُرّة ؟؟؟
غااااااااغ
والطفلة تغرق
فى النخيج
ومن الخليج
حتّى الحليج
الطفلة تشرق
بالنشيج
؟؟؟
يا الدُرّة
عُوُوُوُوُوُد
عُود
يا حبيبْ
عود فى الضجيج
وأصوات رفاقتك
زى طيور
غزَته الصقور
فى ليل غريب .؟
فصلك كئيب .؟
كلّ الفصول ؟!
والريح بهيج
بالغمْ يهيج ؟!
كُرْسيك
علْيْه
المافيش قعَدْ ؟؟
داخْ وإرتعَد
قال فى نحيب:
"يا الدُرّة
دَه أول يوم تغيب
بِسَبَبْ وجِيهْ ؟؟"
قلَدَن دفاتْرك
لى بَعَضْ
"دُرّة النبيه
رُوح..
ماب ترُوحْ
دُرّة العجيبْ"
فى دُرجُو مرْهَم
وشاشْ جروح ؟!
كان نيْتُو
يتخرّج طبيب ..؟!
لكن عوارض الدنيا
والقسْمة
النصيب ؟
الخيّبَت كل الحظوظْ
إلا الرصاصة ..؟
أبت تخِيب؟؟؟
"يا أبوى تماشت
ما تحاف
الحين يدى
الإشعافْ
واتيبْ"
"يا أبوى
تماسك
ما تخاف
الحين يجى الإسعاف
وأطيب"
لكنْو .. آه
آه
..
لا البلد؟
..
لا بُكرَة ؟
..
لا الإسعاف ؟؟
قريب ؟؟
يا الدُرّة ؟!
والعالم ..
غريب
لا يشيل خبارنا
ولا يجيب..!؟
قسْمتنا ..!
نحْنَ أولاد عرب ؟
حتّى العَرَب
قسْمة ونصيبْ ؟!
يا دُرّتى الغالية
يا البيكى
طال ولدى
رفع الجباه
عالية
دلاّيه
غيمْ جَلَدى
روى مُهجتى
الخالية
علّم ضلام خَلَدى
لا أرضى أعيش
جالية ؟؟؟
أو لايجَة
فى بلَدى ؟؟
كفى يا غريَب
بس دُرّة
يرجع ذات وطن
زى دُرّة
لما يغيب
يجيب
لا ينكسرِ طُول
الأبْد
خاطر البلد
لابُدْ
يطيبْ
بالحاجبُو يهتزْ
بالهلالْ
والجانبُو يعتزْ
بالصليبْ
...
دُرّة ويجىء
من
"يا لطيف بى اُمّتكْ"
حسّ البِنَيّة
كما إنهتكْ سقفَ السما
وكرْكَرْ .. رعُـــودْ
يا الدُرّة عُووُوُك
هاكْ بسْمَتكْ
فكّيتا من فكّ الجنودْ
ساعةْ لقيتا
وراء هَرَبْ !
يا دُرّة
زى كُلّ اليهودْ
بالضبْط
زى بعْض الجيوبْ
مشغولة
بى عد النقود ؟؟
وأنا خاتّى حجرين
زى نهود
تهتزّ
قندولين قصب !!
طُلْ بى كعب عالى
الكَعَب
حرْقص خطاى
المن غضَبْ
زى الطربْ ؟؟
هنا والجنود
غرقانة فى الدمْ
للرُكب ؟!
بالضبط
زى أنصاصْ عرب !!
ظنّتنى..
بيّاعة هوى
فتحتْ خشُومه
كمن عَوى
فتْحةْ خشومه
كمن غوى !؟
فكْ كفةْ إيدك
كمْ حجر
فوقنْ هوَى
فكّيتا منها
وأوْوْوْوْوْ هَوا
يا البسْمة
عاينْ دُرّتكْ
من دمّى
طَهْرتْ
ويَاكْ سوا ؟!!
وفوق حتتكْ
غزّيتا عوُد
غزّيتُو
بى دمعى إتروَى
وفتّح ورود
قبْل الربيع
أنا
و
إنت
راجنّك نعُودْ
من جتّتك ؟
...
عَدّ السدودْ
ماكْ من مطرْ ؟
ماكْ من رعود ؟
ماك نسْمة ؟
شنْ حَرَس الحدود ؟
بالله عُود
من بُكرة
من ماضى الجدودْ
من حاضر الوطنْ
الولُود
بالله
زى
ماكْ ياكَ
عُودْ !؟
زى عُود دُرّة
لبان
ولود
بالله عُود
دُرّة الودود
مليان حياة
يا الدُرّة
سمّع لى النشيد ؟
حفّظنى سورة الأنبياء ؟
سيرة الصحابة الأوفياء
كتّبنى فى دفترْ
جديد
دفترْ وهيطْ
الصفحة بارقة
من الخليج
بالغضْبة
باقة
وراء المحيط
أعْربْ لى
"هل هذا الحجر
سَيَدُك
أنظمة الزجاج؟
أمْ أنّ كلّ خروجنا
فى
الأرضِ
قافلةُ
إحتجاج"
يا الدٌرّة
علّمنى الدُواسْ ؟
أنا قادرة
ما يكفى الحماس !
يا الدُرّة
ما توفى الطبول ؟
دا عدُو .. وعبيط !
والحوبة
تحتاج الخيول
اليَنْهَمن
رزّ النحاس
القومْتُو من فجْركْ
نشيط
...
غضَباً منُو ؟
البْيوقفُو ؟!
الشافوه حاروا
يوصّفُوه
قول للسلامْنا
إستقرفوه
والُكلْ كلامْنا
أستنزفوه
لا عيدْ .. مبارك
لا عَفُـــــــو ؟
...
خلّيك كما الزيتونة
حاس
حوْلك لصوص البؤس
تلُوص !؟
لا تعَوّد العين
النعاسْ ؟
سَوْ .. لك
من الليمونة
فاس
لى راحةْ إيديك
الغُبش !
حجر الدُغُشْ
دا
أنسب مقاسْ ؟
ما دام فى ناس
من دمّنا
ويا الدُرّة أفو
دسّو الرصاص
ويا الدُرّة أفو .؟!
ود عمنّا الواحد نفّوه
والتانى لاص
فى الصحراء
أفو ؟
كايسْ لُهُ تار
من جارْ أخُو ؟!
طالبْ القصاصْ ؟
ويا الدُرّة أخُو ؟
شان طلقة جلّت مرفعين
بين السعى ؟!
وناشتْ لُهُ راس ؟!!
صادف ضيوف
إنسالخُوه !!؟
الكاس سخُوه
والراس رخُوه
والبايظ آس !؟
إنشالخُوُه ؟
يا الله
علّمْنى الدواسْ ؟
يا ولاّ
دا الزمن الحجرْ
راح .. ولّى
فات
وكْت السكوت
...
ياجُوج
وماجُوج
القنوط !؟
الأمْركه
وذلّ الشرُوطْ .؟
يا الدُرّة
يا حجرْ
الحجر أقصر طريقة
إلى الخلاص
أكرمْ من أى سلام
سَجَرْ
حرباً تسُوطْ
كل الخطوط
من بنْكنُوتْ
لـ أحلام زَلُوطْ ؟!
ما دامْ فى ناسْ
دسّوا الرصاصْ !!
يا الدُرّة ؟؟
علّمْنى
الدواس ؟؟
أبرانى
زى قلم
الرصاصْ
نيشْ بى التخاذلْ
دا ..
وخلااااااص ؟
خبّرْبى ..
هادى الإنتكاسْ !؟
إنو الحجرْ
دقر الكَجَرْ
أقصر طريقة إلى
الخلاص ؟
...
يا وعد صادقْ
يا وعيدْ ؟
يا اُمّة نلدكْ
منْ جديدْ
يا إمّا
فوق دمّ النفاسْ
السُبة ..كُبّة
من الخليجْ
الإترهبْ
حتّى النسيجْ
الإتنهبْ ؟!
والناسْ رخاصْ ؟!
يا الدُرّة هبْ !
وإنت الذهب
إنك ذهبْ للنار
ضَهَب ؟!
كمْ جمّرُوكَ
من العربْ ؟؟
كمْ من جماعة المسلمينْ ؟
والشعبْ
شعب من اللهبْ ؟؟
أمْرضْ .. أنا
أشحدْ .. هِنا
أقْرضْ
ولا
شُغْل البُنا
على أرضى
فى مستوْطنة ؟!
الله
المدبّرْ
يا بلدْ
هُو ربّنا
العالمْ بنا
وأنا يا رسولْ الله
نشيطْ
رغم التعبْ
يا روعة الإنسانْ
ويا ..
كُلْ خُلاصةْ
بِتْ وهب
يا منْ صَبَرْتَ
على اليهود
وما إستحملوكْ
بعض العرب ؟!
خّذلوك أسيادْ
أقرباكْ .؟!
نَصَرْكْ
ضِعافْ كل ّ العهودْ !
وفى كلّ بلْدة
منْ البلْودْ
فى جنودْ اُمية .؟
وأبى لَهب ؟!
يا الْ لْيكا
ربْ