تويت
عجلت الرحيل
في ذكرى رحيل مصطفى سيد احمد
مالو عجلت الرحيل
ما المسافة بعيدة لسه
وانت في عز الصهيل
يا سلام وكتين تغني
وتطرب الكون بالهديل
تنشر الالق الموشي
وتنثر الحزن النبيل
وتوعد الناس الغلابة
بالزمان المستحيل
وتورق اشجار الاماني
وتزهو جوانا وتميل
وتسمو قاماتنا وتشابي
وتعلو بي فوق للنخيل
مالو عجلت الرحيل
ماالمسافة بعيدة لسه
وانت في عز الصهيل
***
ماشي في الاجيال هديلك
جيل يغني ويدي جيل
وانت زي النيل بتمضي
صافي نبعك سلسبيل
يا سلام لمن تغني
وينجلي الهم الظويل
وتزدهي الدنيا ونحلق
زي عصافير الخميل
والمحبة قطوفة تدنو
وكل شي يصبح جميل
مالو عجلت الرحيل
ما المسافةبعيدة لسه
وانت في عز الصهيل
بسأل الطير الخداري
وبسأل الدوح الظوليل
بسأل ازهار البراري
وبسأل الوان الاصيل
بسأل اسراب القماري
وبسأل البان والنخيل
بسأل المطر النهاري
وبسأل الزمن الجميل
ياتو غيماً جيتنا منو
وياتو برقاً وياتو سيل
مالو عجلت الرحيل
ما المسافة بعيدة لسه
وانت في عز الصهيل
يا زمن كترت دموعنا
ونحن هدانا العويل
الحبايب راحو فاتو
واثرو السفر الطويل
افردو الجنحين وطارو
وما فضل للروح خليل
والفرح لملم متاعه
وفرهد الهم الثقيل
مالو عجلت الرحيل
ما المسافة بعيدة لسه
وانت في عز الصهيل
نحن لسه مع الطيور
المابتعرف ليها خرطة
ولا استراحة ولا مقيل
نمشي في كل الدروب
الشايكة فاقدين الدليل
فينا ماثل لسه طيفك
وعودك الفارع النحيل
وفينا لسه دندناتك
وفينا جددت الخليل
فجأة عزلت ورحلت
وانت في عز الصهيل
مالو عجلت الرحيل
ما المسافة بعيدة لسه
وانت في عز الصهيل
